ཟླ ༤ པའི་ཚེས ༣ ཉིན་ཤིན་ཧྭ་དྲ་བས་པེ་ཅིང་ནས་སྤེལ་བའི་འཕྲིན་དུ། ཚེས་གསུམ་ཉིན་གསར་འགོད་པས་ཆེས་མཐོའི་མི་དམངས་ཞིབ་དཔྱོད་ཁང་ནས་ཤེས་གསལ་ལྟར་ན། ཆེས་མཐོའི་མི་དམངས་ཞིབ་དཔྱོད་ཁང་གིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ་ཟུར་པ། ཀྲུང་དབྱང་སྲིད་ཁྲིམས་ཨུའི་ཧྲུའུ་ཅི་ཀྲོའུ་ཡུང་ཁང་གིས་ལྐོག་རྔན་ཟས་པ་དང་། དབང་ཆ་བྱུང་རྒྱལ་དུ་སྤྱོད་པ། རྒྱལ་ཁབ་ཀྱི་གསང་བ་ཕྱིར་བསྒྲགས་པའི་བྱས་ཉེས་ལ་མྱུལ་ཞིབ་རྩད་གཅོད་བྱས་ཚར་རྗེས། བཅའ་ཁྲིམས་ལྟར་ཁག་བཙུགས་སྡེ་ཁོངས་བརྒྱུད་ཐེན་ཅིན་གྲོང་ཁྱེར་མི་དམངས་ཞིབ་དཔྱོད་ཁང་ཡན་ལག་ཞིབ་དཔྱོད་ཁང་དང་པོར་བསྐྱལ་ནས་ཞིབ་དཔྱད་ཁྲིམས་སྦྱོར་བྱས་ཤིང་། ཟླ་བཞི་བའི་ཚེས་གསུམ་ཉིན་ཡན་ལག་ཞིབ་དཔྱོད་ཁང་དེས་ཐེན་ཅིན་གྲོང་ཁྱེར་གྱི་འབྲིང་རིམ་མི་དམངས་ཁྲིམས་ཁང་དང་པོར་གཞུང་ཕྱོགས་ལ་ཞུ་སྦྱོར་གནང་འདུག
ཞིབ་དཔྱོད་ལས་ཁུངས་ཀྱིས་ཁྲིམས་སྦྱོར་ཞིབ་བཤེར་གནང་སྐབས་ཀྲོའུ་ཡུང་ཁང་མི་སྒེར་ལ་ཞུ་གཏུག་དབང་ཆ་ངོ་སྤྲོད་བྱས་པ་མ་ཟད། ཀྲོའུ་ཡུང་ཁང་ལ་རྩད་འདྲི་དང་། དེའི་བཤེར་རྩོད་དག་འབུད་མཁན་གྱི་བསམ་ཚུལ་ལ་གསན། ཐེན་ཅིན་གྲོང་ཁྱེར་མི་དམངས་ཞིབ་དཔྱོད་ཁང་ཡན་ལག་ཁང་དང་པོའི་ཁྲིམས་སྦྱོར་གྱི་ཉེས་བགྲང་ཞུ་གཏུག་བྱས་པའི་ནང་། ཀྲོའུ་ཡུང་ཁང་གིས་ཀྲུང་གོའི་རྡོ་སྣུམ་རང་བྱུང་སོལ་རླངས་སྤྱི་ཁྱབ་ཀུང་སིའི་སྤྱི་གཉེར་པ་ཟུར་པ་དང་། ཀྲུང་གུང་སི་ཁྲོན་ཞིང་ཆེན་ཨུ་ལྷན་གྱི་ཧྲུའུ་ཅི། ཀྲུང་གུང་ཀྲུང་དབྱང་ཆབ་སྲིད་ཅུས་ཨུ་ཡོན། སྤྱི་བདེ་པུའུ་ཡི་པུའུ་ཀྲང་། རྒྱལ་སྲིད་སྤྱི་ཁྱབ་ཁང་དང་ཀྲུང་གུང་ཀྲུང་དབྱང་ཆབ་སྲིད་ཅུས་རྒྱུན་ཨུ། ཀྲུང་དབྱང་སྲིད་ཁྲིམས་ཨུའི་ཧྲུའུ་ཅི་ལ་སོགས་ཀྱི་འགན་ཁུར་སྐབས་སུ། ལས་གནས་ཀྱི་བབ་ལ་བརྟེན་ནས་གཞན་ལ་ཁྲིམས་འགལ་གྱིས་ཕན་ཁེ་བསྐྲུན་པ་དང་། ལྐོག་རྔན་འབོར་ཆེན་ཟས་བ། དབང་ཆ་བྱུང་རྒྱལ་དུ་སྤྱད་དེ་གཞུང་རྒྱུ་བདག་བཟུང་བཅས་རྒྱལ་ཁབ་དང་མི་དམངས་ཀྱི་ཁེ་ཕན་ལ་གནོད་ཅིང་། སྤྱི་ཚོགས་ལ་ཤན་ཤུགས་ངན་པ་ཐེབས་པའི་བྱས་ཉེས་ཚབས་ཆེན་བསགས་ཡོད་མ་ཟད། རྒྱལ་ཁབ་ཀྱི་གསང་བ་ཁྲིམས་འགལ་གྱིས་ཕྱིར་བསྒྲགས་པའི་བྱས་ཉེས་ཚབས་ཆེན་ཡང་བཟོས་ཡོད་པས། བཅའ་ཁྲིམས་ཀྱི་གཏན་འཁེལ་ལྟར་ལྐོག་རྔན་ཟས་པ་དང་། དབང་ཆ་བྱུང་རྒྱལ་དུ་སྤྱོད་པ། བསམ་གཟས་ན་རྒྱལ་ཁབ་ཀྱི་གསང་བ་ཕྱིར་བསྒྲགས་པ་བཅས་ཀྱི་བྱས་ཉེས་ཐད་ཉེས་འགན་བདའ་འདེད་བྱེད་རྒྱུ་ཐད་བཅད་འདུག(རྩོམ་འགན་པ། རྟ་མགྲིན)
