ཆེས་མཐོའི་མི་དམངས་ཁྲིམས་ཁང་གིས་ཁ་སང་ཞུ་གཏུག་ངོས་ལེན་ཐོ་འགོད་སྒྲིག་སྲོལ་གྱི་བཅོས་བསྒྱུར་བསམ་འཆར་དཔར་བ་དང་། ཟླ ༥ བའི་ཚེས ༡ ཉིན་ནས་ལག་བསྟར་བྱ་རྒྱུ་ཡིན་འདུག ཞུ་གཏུག་ངོས་ལེན་ཞིབ་བཤེར་གྱི་སྒྲིག་སྲོལ་དེ་ཞུ་གཏུག་ངོས་ལེན་ཐོ་འགོད་ཀྱི་ལམ་ལུགས་སུ་བསྒྱུར་ནས། ངོས་ལེན་བྱ་འོས་པའི་གྱོད་གཞི་གང་ཡིན་ཡང་། གྱོད་གཞི་ཡོད་ན་ཐོ་འགོད་བྱེད་ངེས་པ་རེད།
ཀྲུང་དབྱང་རླུང་འཕྲིན་དྲ་བས་པེ་ཅིང་གི་ཟླ ༤ བའི་ཚེས ༡༥ ཉིན་སྤེལ་བའི་གནས་ཚུལ་ལ། ཀྲུང་གོའི་སྐད་སྒྲའི་རླུང་འཕྲིན་གསར་འགྱུར་གྱི་ལེ་ཚན་དུ་བསྒྲགས་དོན། ད་ལོའི་ཟླ ༤ བའི་ཚེས ༡ ཉིན་ཀྲུང་དབྱང་གི་ཁྱོན་ཡོངས་བཅོས་བསྒྱུར་གཏིང་ཟབ་སྤེལ་བའི་འགོ་ཁྲིད་ཚན་ཆུང་གིས་གྲོས་ཚོགས་ཐེངས་བཅུ་གཅིག་པའི་སྟེང《མི་དམངས་ཁྲིམས་ཁང་གིས་ཞུ་གཏུག་ངོས་ལེན་ཐོ་འགོད་ལམ་ལུགས་བཅོས་བསྒྱུར་ལག་བསྟར་བྱ་བའི་སྐོར་གྱི་བསམ་འཆར》ལ་གྲོས་བསྡུར་ཐག་གཅོད་གནང་བ་དང་། ཁ་སང་སྟེ་ཚེས ༡༥ ་ཉིན་ཆེས་མཐོའི་མི་དམངས་ཁྲིམས་ཁང་གིས《བསམ་འཆར》དེ་ཕྱིར་བསྒྲགས་ནས། ཟླ ༥ བའི་ཚེས ༡ ཉིན་ནས་བཟུང་ལག་བསྟར་བྱ་རྒྱུ་རེད། ཆེས་མཐོའི་མི་དམངས་ཁྲིམས་ཁང་གིས་འདི་གའི་གསར་འགོད་པའི་བཅར་འདྲི་དང་ལེན་བྱས་ནས་འགྲེལ་བཤད་གསལ་པོ་བྱས་སོང་།
《བསམ་འཆར》དེའི་འགོ་བཟུང་མ་ཐག་ནས། གྱོད་ཡ་སོ་སོའི་ཞུ་གཏུག་གི་དབང་ཆར་ཁྱོན་ཡོངས་ནས་འགན་ལེན་བྱ་རྒྱུ་ཡིན་པ་དང་། མི་དམངས་མང་ཚོགས་ཀྱིས་ཡར་ཞུ་བྱེད་བཞིན་པའི“ཞུ་གཏུག་ངོས་ལེན་བྱ་དཀའ་བའི”གནད་དོན་ངེས་པ་དོན་གྱིས་ཐག་གཅོད་ཡག་པོ་གནང་རྒྱུ། ཁྲིམས་ཁང་གིས་གྱོད་དོན་ངོས་ལེན་བྱེད་པའི་ལག་ལུགས་ལ་བཅོས་བསྒྱུར་བྱས་ནས། ཞུ་གཏུག་ངོས་ལེན་ཞིབ་བཤེར་གྱི་སྒྲིག་སྲོལ་དེ་ཞུ་གཏུག་ངོས་ལེན་ཐོ་འགོད་ཀྱི་ལམ་ལུགས་སུ་བསྒྱུར་རྒྱུ་ཡིན་པར་བསྟན་འདུག
ཆེས་མཐོའི་མི་དམངས་ཁྲིམས་ཁང་གི་འགོ་གཙོ་གཞོན་པ་ཅིང་ཧན་ཁྲའོ་ཡིས་གསུངས་དོན། ཞུ་གཏུག་ངོས་ལེན་ཞུ་བཤེར་གྱི་སྒྲིག་སྲོལ་དེའི་གཞི་རྩའི་ཁྱད་ཆོས་ནི་གྱོད་པ་སོ་སོའི་ཁྲིམས་ཁང་ལ་ཞུ་གཏུགས་བྱས་རྗེས། ཁྲིམས་ཁང་གིས་ཞུ་གཏུགས་ཀྱི་ཆ་རྐྱེན་ཚང་མིན་ལ་ངེས་དོན་གྱི་ཞུ་བཤེར་བྱ་རྒྱུ་དང་། དོན་དངོས་དང་བདེན་དཔང་ལ་ལར་ཞིབ་བཤེར་ནན་མོ་བྱ་དགོས་ཏེ། དོན་དངོས་སུ་ངོས་ལེན་བྱ་འོས་པའི་གྱོད་དོན་ཞིག་འདི་ལྟར་ཕྱི་སྒོར་བཀག་པ་རེད། ཞུ་གཏུག་ངོས་ལེན་ཐོ་འགོད་ཀྱི་ལམ་ལུགས་ནི་དེའི་མིང་ཁོ་ནར་བསམ་ནའང་། དེས་ཞུ་གཏུག་གི་ཆ་རྐྱེན་འདང་མིན་ཟེར་བར་མི་བལྟ་ཞིང་། ཁྲིམས་ཀྱི་གཏན་འཁེལ་ལྟར་འགྲོ་ལུགས་ཀྱི་ཆ་རྐྱེན་ཙམ་ལ་སྤྱིར་བཏང་གི་ངོ་བསྡུར་ཙམ་བྱས་པ་རེད། ཁྲིམས་དང་མཐུན་པའི་ཞུ་གཏུག་ངོས་ལེན་གྱི་ཆ་རྐྱེན་འཛོམས་པའི་གྱོད་དོན་ཡོད་ཚད་ལ་ཞུ་གཏུགས་ངོས་ལེན་གྱི་ཐོ་འགོད་བྱ་དགོས། འདི་ནི་དོན་དངོས་སུ་གྱོད་དོན་ངོས་ལེན་བྱེད་པའི་ཁྱབ་རྒྱ་ཇེ་ཆེ་དང་ཁ་གྲངས་ཇེ་མང་དུ་བཏང་བ་འབའ་ཞིག་རེད།
ཞུ་གཏུག་ངོས་ལེན་ཐོ་འགོད་ཀྱི་ལམ་ལུགས་བཅོས་བསྒྱུར་གྱི་གཙོ་གནད་དེ་བྱ་བའི་ལམ་སྲོལ་ལ་ལེགས་བཅོས་དང་འགན་འཁུར་རྩད་གཅོད་ལ་ཤུགས་སྣོན་པ་འདི་གཉིས་ཀྱི་སྟེང་ན་འདུག དེ་ལ།
དང་པོ། བཅའ་ཁྲིམས་དང་མཐུན་པའི་ཞུ་གཏུག་དང་ཞུ་སྦྱོར་ཡར་ཞུ་སོགས་གང་ཡིན་ཡང་ཚང་མའི་གཏུག་ཡིག་དང་ལེན་བྱས་ནས། འཕྲད་དུ་ངོས་ལེན་ཐོ་འགོད་བྱེད་པ། གཉིས་པ། རྒྱུ་ཆའི་ཡི་གེ་སོགས་རྣམ་པའི་ཆ་རྐྱེན་དང་མི་མཐུན་པ་ཡོད་ཚེ། དུས་ཐོག་ཏུ་གསལ་འགྲེལ་བྱེད་པ་དང་། ཡིག་ཐོག་ནས་ཐེངས་གཅིག་ལ་གནད་དོན་དག་གསལ་བོར་འདོན་པ་དང་བཟོ་བཅོས་བྱེད་པའི་དུས་བཀག་སོགས་བརྡ་འཕྲོད་པར་བྱ་དགོས། གསུམ་པ། བཅའ་ཁྲིམས་ཀྱི་དུས་བཀག་གསལ་ཐག་མི་ཆོད་པ་རྣམས་སྔོན་ལ་འཕྲད་དུ་ཐོ་འགོད་བྱེད་པ། བཞི་བ། ཁྲིམས་དང་མི་མཐུན་པའི་གནས་ཚུལ་ཡོད་ཚེ། ཁྲིམས་ལྟར་ངོས་ལེན་མི་བྱེད་པའམ་ཐོ་འགོད་མི་བྱེད་པ་མ་ཟད་རྒྱུ་མཚན་གསལ་བཤད་བྱ་དགོས། གྱོད་ཡ་སོ་སོར་ཡིད་འཐད་མེད་པ་འདྲ་ཡིན་ཚེ། གོང་རིམ་ཞུ་གཏུག་བྱེད་པའམ་བསྐྱར་ཞིབ་བྱས་ཆོག ཡི་གེ་སྐོར་དང་ལེན་མི་བྱེད་པ་དང་ཞུ་ལན་མི་སྤྲོད་པ། ཁྲིམས་ཀྱི་ཡི་གེ་ཕྱིར་མི་སྟོན་པ་སོགས་བྱས་མི་ཆོག ལྔ་པ། ནང་ཁུལ་གྱི་བལྟ་རྟོག་ལ་ཤུགས་སྣོན་པ་དང་། དམངས་ཆེན་དང་རྟོག་ཞིབ་ལས་ཁུངས། སྤྱི་ཚོགས་སོགས་ཀྱི་ཕྱིའི་བལྟ་རྟོག་ལའང་ཤུགས་སྣོན་གང་ལེགས་བྱ་དགོས། དྲུག་པ། འགན་འཁུར་རྩད་གཅོད་ལ་ཤུགས་བསྣན་ནས། ཞུ་གཏུག་ངོས་ལེན་མི་བྱེད་པ་དང་ཞུ་གཏུག་ངོས་ལེན་ལ་འགོར་འགྱངས་བྱེད་པ། ལོ་མཇུག་ཏུ་ཞུ་གཏུག་ངོས་ལེན་མི་བྱེད་པ། ཞུ་གཏུག་ངོས་ལེན་ལ་བར་ཆད་བཟོ་བ་དང་ཁྲིམས་ལྟར་ཞུ་གཏུག་ངོས་ལེན་བྱེད་པར་འགལ་རྐྱེན་བཟོ་བ་སོགས་ཀྱི་ཁྲིམས་འགལ་བྱ་སྤྱོད་ལ། འབྲེལ་ཡོད་འགན་འཁུར་མི་སྣར་སྒྲིག་ཁྲིམས་ལྟར་ཐག་གཅོད་ནན་མོ་བྱེད་པ་དང་། སོ་སོའི་འགོ་ཁྲིད་ཀྱི་འགན་འཁུར་ཡང་རྩད་གཅོད་བྱ་ངེས།
ཅིང་ཧན་ཁྲའོ་ཡིས་ད་དུང་བཤད་རྒྱུར། གྱོད་དོན་གྱི་དུས་རིམ་ནི་གཙོ་བོ་ཐོག་མའི་ཞུ་གཏུག་ལ་སྟོན་པ་ཡིན་ལ། དེ་ཡང་ང་ཚོས་རྒྱུན་པར་བཤད་པའི་ཞུ་བཤེར་བྱ་ཐེངས་དང་པོ་དེ་ཡིན་པ་དང་། གྱོད་དོན་གྱི་དབྱེ་བའི་སྒོ་ནས་བལྟས་ན། དམངས་དོན་གྱོད་གཞི་དང་སྲིད་འཛིན་གྱོད་གཞི། ཉེས་དོན་གྱོད་གཞིའི་ཞུ་གཏུག བཙན་ཤེད་ལག་བསྟར་བྱ་བའི་གྱོད་གཞི། རྒྱལ་ཁབ་ཀྱིས་སྐྱིན་ཚབ་འཇལ་བའི་གྱོད་གཞི་སོགས་སྟོན་པ་རེད། དམིགས་ཡུལ་ཆ་རྐྱེན་ལ་གཞིགས་ནས་བཤད་ན། ཁྲིམས་ཀྱི་གཏན་འབེབས་དང་མཐུན་པའི་གྱོད་དོན་ཡོད་ཚད་ལ་ཞུ་གཏུག་ངོས་ལེན་གྱི་ཐོ་འགོད་བྱ་དགོས་པ་དང་། ཞུ་གཏུག་ཐམས་ཅད་ལ་ཐག་གཅོད་རེ་གནང་དགོས། དེ་ལས་ལྡོག་སྟེ་ཁྲིམས་དང་འགལ་བའི་སྒོ་ནས་ངོས་ལེན་མ་བྱས་ན་མི་ཆོག(རྩོམ་འགན་པ། རྟ་མགྲིན)
