གསར་འགོད་པས་བོད་ལྗོངས་སློབ་ཆེན་ནས་རྒྱུས་ལོན་པ་ལྟར་ན། ད་ལོར་བོད་ལྗོངས་སློབ་ཆེན་གྱིས་གསར་འགྱུར་རིག་པ་ལས་བོད་སྐད་རྒྱང་སྒྲོག་དང་མདོ་འཛིན་སྒྱུ་རྩལ་གྱི་ཕྱོགས་ནས་བོད་ལྗོངས་ཁོ་ནར་ཁ་གཏད་དེ་ཆེད་ལས་ཀྱི་སློབ་མ་བསྡུ་རྒྱུ་ཡིན་པ་རེད། བསྡོམས་པས་སློབ་མ ༢༥ བསྡུ་རྩིས་ཡོད་པ་དང་། དེའི་ནང་སློབ་མ་ཕོ ༡༢ དང་མོ ༡༣ འདུས། ཐེངས་འདིའི་སློབ་བསྡུའི་ངོ་བོ་ནི་དགེ་ཐོན་མ་ཡིན་པའི་དངོས་གཞིའི་སློབ་མ་ཡིན་པ་རེད།
དེ་ཡང་མིང་འགོད་རྒྱུགས་སྤྲོད་ཀྱི་ཆ་རྐྱེན་ནི《 ༢༠༡༥ ལོའི་བོད་རང་སྐྱོང་ལྗོངས་ཀྱི་མཐོ་རིམ་སློབ་གྲྭ་དཀྱུས་མའི་སློབ་བསྡུའི་སྒྲིག་སྲོལ 》དང་མཐུན་དགོས་པ་མ་ཟད། ལྷ་སའི་ཁ་སྐད་ལ་བྱང་ཆ་ལྡན་པ། གཟུགས་པོ་བདེ་ཐང་ཡིན་པ། དབང་བོ་ཚུལ་ལྡན་ཡིན་པ། མགྲིན་པའི་གནས་ཚུལ་ལེགས་པ། སྒྲ་འབྱིན་གནས་དང་སྐད་གདངས་ཀྱི་ཆ་རྐྱེན་བཟང་པོ་ཡོད་པ་བཅས་ཀྱི་ཆ་རྐྱེན་ཚང་དགོས་པ་རེད།
མིང་འགོད་རྒྱུགས་སྤྲོད་ཀྱི་ཆ་རྐྱེན་འཛོམས་པའི་རྒྱུགས་ཞུགས་མི་སྣས་དྲ་ངོས་ནས་མིང་ཐོ་བཀོད་དེ་རྒྱུགས་ལེན་གྱི་ཐོབ་ཐང་ལེན་དགོས་པ་མ་ཟད། དུས་ཚོད་ངེས་གཏན་གྱི་ནང་བོད་ལྗོངས་སློབ་ཆེན་སློབ་ཁུལ་རྙིང་བའི་བྱ་འགུལ་ལྟེ་གནས་ཀྱི་ནུབ་ངོས་ནས་ཡུལ་དངོས་མིང་ཐོ་འགོད་དགོས། ཆེད་ལས་རྒྱུགས་སྤྲོད་དུས་ཚོད་ནི་ཟླ ༤ ཚེས ༢༥ ཉིན་ཡིན་པ་དང་། བསྐྱར་མའི་རྒྱུགས་སྤྲོད་དུས་ཚོད་ནི་ཟླ ༤ ཚེས ༢༦ ཉིན་རེད། རྒྱུགས་ལེན་ས་གནས་ནི་བོད་ལྗོངས་སློབ་ཆེན་སློབ་ཁུལ་རྙིང་བའི་རྩོམ་རིག་གླིང་དང་སློབ་མའི་བྱ་འགུལ་ལྟེ་གནས་ཡིན་པ་རེད། རྒྱུགས་གཞིའི་ནང་དོན་གྱི་ཐད་ནས་རྩོམ་ཡིག་གྱེར་འདོན་ཏེ་རྒྱུགས་ཞུགས་མི་སྣས་རྒྱན་བླངས་ནས་ཀློག་བྱའི་མ་རྩོམ་བདམས་ནས་ལྷ་སའི་སྐད་ཀྱིས་གྱེར་འདོན་བྱེད་པ་དང་གཅིག སྐབས་ཐོག་བརྗོད་གཞི་ལ་དཔྱད་གཏམ་བརྗོད་པ་སྟེ་རྒྱུགས་ར་ནས་རྒྱན་བླངས་ཏེ་བརྗོད་གཞི་འདེམས་པ་དང་། སྐར་མ་ལྔའི་ནང་གྲྭ་སྒྲིག་བྱས་ནས་དཔྱད་གཏམ་སྤེལ་བ་དང་གཉིས། མི་སྒེར་གྱི་ནུས་རྩལ་ཕྱིར་མངོན་པ་དང་གསུམ་བཅས་འདུས། མཇུག་མཐར་སློབ་བསྡུའི་འཆར་གཞི་དང་བསྐྱར་ལེན་རྒྱུགས་སྤྲོད་མི་སྣའི་གྲངས་འབོར་ལས་ཆེས་མཐའ་འཇུག་གི་སྐར་མཚམས་གཅོད་དགོས་པ་དང་། བསྐྱར་མའི་རྒྱུགས་ལེན་སྐར་འབྲས་ལོངས་པའི་རྒྱུགས་སྤྲོད་མི་སྣའི་མིང་ཐོ་དེ་ ༢༠༡༥ ལོའི་ ཟླ་ ༥ བའི་ ཚེས ༢༥ ཉིན་དུ། བོད་ལྗོངས་སློབ་ཆེན་སློབ་རའི་དྲ་བའི་སློབ་བསྡུའི་ཆ་འཕྲིན་སྟེགས་བུ་ནས་ཁྱབ་བསྒྲགས་བྱ་རྒྱུ་རེད།
