ལན་ཇུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གི་གསར་འགྱུར་ལྟར་ན། ཁ་སང་ཀན་སུའུ་ཞིང་ཆེན་ལན་ཇུ་གྲོང་ཁྱེར་གྱི་འབྲིང་རིམ་མི་དམངས་ཁྲིམས་ཁང་དུ་མཚོ་སྔོན་ཞིང་ཆེན་རྒྱུན་ལས་ཨུ་ཡོན། ཟི་ལིང་གྲོང་ཁྱེར་གྱི་ཧྲུའུ་ཅི་སྔོན་མ་མའོ་ཞོ་པེན་གྱིས་གཞུང་རྒྱུ་སྒེར་སྤྱོད་བྱས་པའི་ནག་ཉེས་གསལ་བསྒྲགས་བྱས་ཟེར།
ལན་ཇུ་གྲོང་ཁྱེར་མི་དམངས་རྟོག་དཔྱོད་ཁང་གིས་གཏུག་བཤེར་བྱས་པ་ལྟར་ན། ༡༩༩༥ལོའི་ལོ་མཇུག་ནས༢༠༡༣ལོར་ལོ་མཇུག་བར་དུ། གཏུག་བྱ་མའོ་ཞོ་པེན་གྱིས་མཚོ་སྔོན་ཞིང་ཆེན་ཞིན་ཐེ་རི་བོའི་གཏེར་རྡོ་རྒྱུན་ལས་ཨུ་ཡོན་ཅུས་ཀྲང་དང་། ནུབ་ཕྱོགས་གཏེར་སྔོག་ཚད་ཡོད་འགན་ལེན་ཀུང་ཟིའི་སྤྱི་འཛིན། ནུབ་ཕྱོགས་གཏེར་སྔོག་ཚོགས་པ་ཚད་ཡོད་ཀུང་ཟིའི་སྤྱི་འཛིན། ཟི་ལིང་གྲོང་ཁྱེར་མི་དམངས་སྲིད་གཞུང་གི་གྲོང་ཁྱེར་གཙོ་འཛིན། ཀྲུང་གུང་ཟི་ལིང་རྒྱུན་ལས་ཨུ་ཡོན་ཧྲུའུ་ཅི་སོགས་ཀྱི་དབང་ཆ་ལ་བརྟེན་ནས། ཟི་ལིང་བོད་ཡུལ་ཚོང་གཉེར་ཚད་ཡོད་ཀུང་ཟི། ཞིན་ཐེ་རི་བོའི་ཡུང་ཞིན་བཙོ་སྦྱངས་བཟོ་གྲྭ། མཱ་ཆང་། ཝང་ཀྲུང་ལིང་སོགས་ལས་ཁུངས་དང་མི་སྒེར༣༠ལྷག་གི་ཚོང་རྫས་འགྲེམ་འཚོང་། ལས་གཞིའི་འཆར་འགོད། ས་གནས་གསར་སྤེལ་སོགས་ཀྱི་ཐད་དུ་རོགས་རམ་བྱས་ནས་ཐད་ཀར་དང་བརྒྱུད་ནས་གོང་གི་ལས་ཁུངས་དང་མི་སྒེར་དེ་དག་ལ་དམངས་སྒོར་དུང་ཕྱུར༡.༠༤༨༡༨༢༧༤ཡི་མ་རྩའི་སྒེར་སྤྱོད་དང་ལྐོག་ཟས་བྱས་པས་ཁྲིམས་ཐག་ནན་མོ་འབབ།
དེ་མིན་ཡང་སྤྱི་ལོ༢༠༠༦ལོའི་ཟླ༣པ་ནས༦པ་བར། མའོ་ཞོ་པེན་གྱིས་དབང་ཆ་སྤྱད་ནས་ནུབ་ཕྱོགས་གཏེར་ལས་ཚད་ཡོད་འགན་ལེན་ཀུང་ཟིའི་སྤྱི་འཛིན་པའི་ཆ་ནས་གཞན་དང་ཁྱི་སྐྱག་ངན་འབྲེལ་བྱས་ཏེ་གན་རྒྱ་རྫུན་མ་བཟོ་བའི་ལམ་ནས་ཁག་ཐེག་གི་དངུལ་ནུབ་ཕྱོགས་གཏེར་ལས་ཚད་ཡོད་འགན་ལེན་ཀུང་ཟིའི་གཞུང་སྒོར་དུང་ཕྱུར༤བཀོལ་ཏེ་ཚོང་གཉེར་ཁེ་བསྐྱེད་ཀྱི་བྱ་བ་སྒྲུབ་པ་དང་། རྗེས་སུ་མ་དངུལ་དེ་ཕྱིར་སྐྱེད་དང་བཅས་པ་བསྡུས་སོང་བས་གཞུང་སྒེར་སྒེར་སྤྱོད་ཀྱི་ཁྲིམས་ཐག་ལྕི་མོ་འབབ།
ཁྲིམས་ཁང་ནང་དུ་སྤྱི་པའི་གཏུར་བཤེར་པས་འབྲེལ་ཡོད་ཀྱི་དཔང་ཡིག་བསྟན་པ་དང་། མའོ་ཞོ་པེན་དང་དེའི་གཟུ་བས་རྩོད་པ་བྱས། ཕྱོགས་གཉིས་ཀས་རྩོད་པ་མང་པོ་བྱས་པའི་མཐར། མའོ་ཞོ་པེན་གྱིས་མཐའ་མཇུག་ནག་ཉེས་དང་ལེན་བྱས་པ་དང་། མའོ་ཞོ་པེན་གྱི་ཉེ་དུ་དང་མི་དམངས་འཐུས་ཚབ། སྲིད་གྲོས་ཨུ་ཡོན། སྨྱན་བྱེད་གསར་འགོད་པ་སོགས་ལས་རིགས་མི་འདྲ་བ་མང་པོས་ཟུར་ཉན་བྱས།
