ཕྱི་ཚེས ༦ ཉིན་དབྱིན་ཇིའི་རྒྱལ་སྲས་རྗོར་རྗི་བྱིས་གཉོར་ཁང་དུ་འགྲོ་མགོ་བརྩམས་པ་དང་། ཉིན་དེར་རྒྱལ་བོ་ཝེ་ལེམ་དང་བཙུན་མོ་ཁེ་ཐི་གཉིས་ཀྱིས་རྒྱལ་སྲས་རྗོར་རྗི་སློབ་གྲྭར་བསྐྱལ་ཅིང་། ཕ་མ་གཉིས་ཀས་ད་དུང་སློབ་གྲྭའི་སྒོ་ཆེན་མདུན་ནས་ཁོ་ལ་དྲན་རྟེན་འདྲ་པར་བསྐྱོན་འདུག འབྲེལ་ཡོད་མི་སྣས་ཕྱིར་བསྟན་པའི་འདྲ་པར་གཉིས་ལས་རྒྱལ་སྲས་ཀྱི་བརྟུལ་ཞུགས་ཡོངས་སུ་མཚོན་ཐུབ་པར་འདུག་སྐད།
རྒྱལ་སྲས་རྗོར་རྗི་ནི་སྤྱི་ལོ ༢༠༡༣ ལོའི་ཟླ ༧ པར་སྐྱེས་ཤིང་། དབྱིན་ཇི་རྒྱལ་བོའི་གདུང་རབས་གསུམ་པའི་ཁྲི་འཛིན་ཡིན། ཁོ་རང་འགྲོ་སའི་བྱིས་གཉོར་ཁང་ནི་དབྱིན་ཇིའི་ཤར་ཕྱོགས་སུ་ཡོད་པ་དང་། བྱིས་གཉོར་ཁང་དེས་མིག་སྔར་ལོ་ལྔ་མན་གྱི་བྱིས་པ་ཉི་ཤུ་ལྷག་བསྡུས་ཡོད་འདུག
བྱིས་གཉོར་ཁང་འདིའི་སློབ་རིན་ལྟོས་ས་ལྟོས་འཇོག་གིས་ཅུང་ཟད་དམའ་བ་དང་། དུས་ཚོད་ཆུ་ཚོད་གཅིག་ལ་དབྱིན་སྒོར ༥.༥ དང་ཉིན་གཅིག་ལ་དབྱིན་སྒོར ༣༣ རེད། རྒྱལ་སྲས་ཀྱི་ཡབ་ཡུམ་གཉིས་སྡོད་སའི་ཕོ་བྲང་ཡང་བྱིས་གཉོར་ཁང་གི་ཐག་ཉེ་སར་ཡོད་པ་དང་། རྒྱལ་སྲས་གཟའ་འཁོར་གཅིག་ནང་ནས་ཉིན་གཉིས་ནས་གསུམ་ལ་བྱིས་གཉོར་ཁང་དུ་འགྲོ་དགོས་པ་དང་། བྱིས་གཉོར་ཁང་གི་འཚོ་བ་གོམས་ལོབས་སུ་སོང་བ་དང་བསྟུན་ཉིན་གྲངས་ཇེ་མང་ལ་གཏོང་རྒྱུ་ཡིན་འདུག
སྔར་སྲོལ་ལྟར་ན་དབྱིན་ཇིའི་རྒྱལ་བོ་ཆུང་དུས་བྱིས་གཉོར་ཁང་དུ་མི་བསྐྱལ་བར་སྒེར་ནས་དགེ་རྒན་གདན་འདྲེན་ཞུ་བཞིན་ཡོད་མོད། རྒྱལ་བོ་ཝེ་ལེམ་གྱི་ཡུམ་གྱིས་ཁོ་རང་ཆུང་དུས་ནས་བྱིས་གཉོར་ཁང་དུ་བསྐྱལ་ནས་སློབ་སྦྱོང་བྱེད་དུ་བཅུག་པས། རྗོར་རྗི་ཡང་རྒྱལ་བོ་ཝེ་ལེམ་བཞིན་དབྱིན་ཇིའི་བྱིས་པ་ཕལ་མོ་ཆེ་ནང་བཞིན་སློབ་གསོ་མྱོང་རྒྱུའི་སྲོལ་དུ་ཆགས། དེ་ཡང་རྗོར་རྗིས་བྱིས་གཉོར་ཁང་དུ་འཁུར་བའི་དཔེ་ཁུག་ཏུ་འདྲུད་ལྷམ་ཆ་གཅིག་དང་ཁོག་སྟོད་ཁོག་སྨད་ཆ་གཅིག རྐང་འབོབ་ཆ་གཅིག ད་རུང་བྱིས་གཉོར་ཁང་གི་བྱིས་པ་གཞན་པ་དང་ལྷན་དུ་བཟའ་རྒྱུའི་སིལ་ཏོག་བཅས་བསྡུས་ཡོད་པ་ལས། རྒྱལ་སྲས་ཀྱི་ཡབ་ཡུམ་གཉིས་ཀས་ཁོ་རང་གཞན་གྱི་བྱིས་པ་དང་གཅིག་མཐུན་སྒོས་བྱིས་པའི་འཚོ་བ་ལོངས་སུ་སྤྱོད་འདོད་ཀྱི་འདུན་པ་མཚོན་འདུག
