དྲི་བ། ཉེ་ཆར། སོ་ཏི་ཨ་རབ་དང་པ་རེན། སུའུ་ཏན། ཅི་པོའུ་ཐི་བཅས་ཀྱི་ས་ཁུལ་དང་རྒྱལ་ཁབ་སོ་སོ་ནས་དབྱི་རན་རྒྱལ་ཁབ་ལ་ཕྱི་འབྲེལ་གྱི་འབྲེལ་མཚམས་བཅད་པ་དང་ཡང་ན་དབྱི་རན་རྒྱལ་ཁབ་བར་གྱི་ཕྱི་འབྲེལ་གྱི་འབྲེལ་མཚམས་ཇེ་དམར་བཏང་འདུག རྒྱུ་རྐྱེན་འདི་དག་ལ་བརྟེན་དབུས་ཤར་ས་ཁུལ་ལ་ཡང་བསྐྱར་དམིགས་གསལ་གྱི་འགལ་བ་དང་འཁྲུག་རྩོད་འཐེན་འཁྱེར་སོགས་ཇེ་ཆེར་འགྲོ་ཉེན་ཡོད་སྐབས་འདིར་ཀྲུང་གོའི་སྲིད་གཞུང་གི་འབྲེལ་ཡོད་ལས་ཁུངས་ཁག་སོ་སོ་ནས་གོང་འཁོད་ཀྱི་ས་ཁུལ་འདི་དག་ལ་འབྲེལ་ལམ་བྱས་ནས་དབུས་ཤར་ས་ཁུལ་གྱི་རྒྱལ་ཁབ་སོ་སོའི་བར་གྱི་འཁྲུག་རྩོད་ཞི་འདུམ་ཡོང་བར་བྱེད་འདོད་དམ།
དྲི་ལན།ང་ཚོས་ཐེངས་གང་མང་ལ་ཀྲུང་གོའི་སྲིད་གཞུང་ནས་དབུས་ཤར་ས་ཁུལ་གྱི་ད་ལྟའི་འཁྲུག་རྩོད་དང་འཐེན་འཁྱེར་སྣ་ཚོགས་ཀྱི་ཛ་དྲག་གི་གནས་བབས་འདི་དག་ལ་དོ་ཁུར་བྱེད་བཞིན་ཡོད་པ་གསལ་སྒྲགས་བྱས་ཡོད་ལ། ཀྲུང་གོའི་སྲིད་གཞུང་གི་རེ་བར་འབྲེལ་ཡོད་ཀྱི་རྒྱལ་ཁབ་སོ་སོ་ནས་ད་ལྟའི་ཛ་དྲག་གི་གནས་བབས་འདིར་གཞིགས་ནས་སོ་སོ་ནས་ཕན་ཚུན་ལ་ཡིད་རྟོན་དང་གུས་བརྩི་ཡོད་པའི་ངང་འབྲེལ་ལམ་སྣ་ཚོགས་བརྒྱུད་ནས་འགལ་བ་འདི་དག་ལ་ཐག་གཅོད་བྱེད་པའམ་དབུས་ཤར་ས་ཁུལ་གྱི་རྒྱལ་ཁབ་སོ་སོའི་བར་ཞི་མོལ་ཡོང་རྒྱུར་རེ་བ་བྱེད་བཞིན་ཡོད། མིག་སྔར། ཀྲུང་གོའི་ཕྱི་འབྲེལ་པུའུ་ཡི་པུའུ་ཀྲང་གཞོན་པ་ཀྲེང་མིན་ལགས་ཀྱིས་སོ་ཏི་ཨ་རབ་ལ་རྒྱལ་དོན་འཚམས་འདྲི་བྱེད་བཞིན་ཡོད་ལ། སོ་ཏི་ཨ་རབ་ལ་རྒྱལ་དོན་འཚམས་འདྲི་བྱས་རྗེས་ད་དུང་དབྱི་རན་ལ་རྒྱལ་དོན་འཚམས་འདྲི་བྱེད་དགོས་ཡོད། ཀྲུང་གོའི་ཕྱི་འབྲེལ་པུའུ་ཡི་པུའུ་ཀྲང་གཞོན་པ་ཀྲེང་མིན་ལགས་ཀྱིས་ཕྱོགས་གཉིས་བར་གྱི་འགལ་བའི་གནད་དོན་ཐད་ལ་བསམ་ཚུལ་བརྗེ་རེས་བྱ་རྒྱུ་ཡིན་པ་དང་། ཀྲུང་གོའི་སྲིད་གཞུང་ནས་པེ་ཅིང་ནས་ཀྱང་དབུས་ཤར་གྱི་འགལ་བའི་ཕྱོགས་གཉིས་བར་གྱི་རྒྱལ་ཁབ་སོ་སོར་བསམ་ཚུལ་དང་འབྲེལ་ལམ་གང་མང་བྱས་མྱོང་། ང་ཚོའི་རེ་བར་དབུས་ཤར་ས་ཁུལ་གྱི་འགལ་བའི་ཕྱོགས་སོ་སོ་ནས་ཕན་ཚུན་ལ་ཡིད་རྟོན་དང་གུས་བརྩི་ཡོད་པའི་ངང་འབྲེལ་ལམ་སྣ་ཚོགས་བརྒྱུད་ནས་འགལ་བ་འདི་དག་ལ་ཐག་གཅོད་བྱེད་པའམ་དབུས་ཤར་ས་ཁུལ་གྱི་རྒྱལ་ཁབ་སོ་སོའི་བར་ཞི་མོལ་ཡོང་རྒྱུར་རེ་བ་བྱེད་བཞིན་ཡོད།
དྲི་བ། གོ་ཐོས་ལྟར་ན། ཀྲུང་གོའི་ཕྱི་འབྲེལ་པུའུ་ནས་ཁ་སང་གི་དགོང་མོར་ཁོར་བྱང་གི་གཞུང་ཚབ་དཔོན་ལ་ཐུག་འཕྲད་བྱས་སོང་བ་ཟེར་བ་བདེན་ནམ་ཅི། ཉིད་ཀྱིས་
གསལ་ཁ་འདོན་རོགས།
དྲི་ལན།ཁ་སང་ཀྲུང་གོའི་སྲིད་གཞུང་གིས་ཕྱི་འབྲེལ་པུའུ་བརྒྱུད་ནས་ཐེངས་འདིའི་ཁོར་བྱང་ནས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་ཀྲུང་གོའི་སྲིད་གཞུང་གི་ལངས་ཕྱོགས་དང་ལྟ་བ་སོགས་གསལ་སྒྲགས་བྱས་ཡོད་ལ། ཀྲུང་གོའི་སྲིད་གཞུང་གི་འགོ་ཁྲིད་རིམ་པ་ཁག་གིས་ཀྱང་ཁོར་བྱང་གི་ཀྲུང་གོའི་གཞུང་ཚབ་དཔོན་དང་བཅས་པའི་འགན་འཛིན་པ་ཚང་མར་ཁོར་བྱང་ནས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་ཀྲུང་གོའི་སྲིད་གཞུང་གི་ལངས་ཕྱོགས་དང་
ལྟ་བ་སོགས་གསལ་འདོན་བྱས་ཡོད།
དྲི་བ། ཐེངས་འདིར་ཁོར་བྱང་ནས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་ཨ་རི་དང་ཁོར་ལྷོའི་སྲིད་གཞུང་གི་སྲིད་འཛིན་གཉིས་ནས་ཁ་པར་གྱི་འབྲེལ་ལམ་བརྒྱུད་ནས་ཁོ་རེ་ཡ་ཕྱེད་གླིང་གི་ཛ་དྲག་གནས་བབས་ཐད་ལ་བསམ་ཚུལ་བརྗེ་རེས་བྱས་ཡོད་འདུག་ལ། ཁོར་ལྷོའི་སྲིད་གཞུང་གིས་ཨ་རིའི་སྲིད་གཞུང་བརྒྱུད་ནས་འཐབ་ཇུས་རང་བཞིན་ཅན་གྱི་མཚོན་ཆ་དགོས་པར་རེ་བ་བྱེད་བཞིན་ཡོད་འདུག ཨ་རི་དང་ཁོར་ལྷོའི་སྲིད་གཞུང་གཉིས་ཀྱིས་མུ་འཐུད་དུ་འཐབ་ཇུས་རང་བཞིན་ཅན་གྱི་མཚོན་ཆ་གྲབས་གཤོམ་དང་གོ་སྒྲིག་བྱས་ན་ཀྲུང་གོའི་སྲིད་གཞུང་གི་བསམ་ཚུལ་ག་འདྲ་ཡིན་པ་དང་། ཀྲུང་གོའི་སྲིད་གཞུང་གིས་ཨ་རི་དང་ཁོར་ལྷོའི་སྲིད་གཞུང་གཉིས་ནས་འཐབ་ཇུས་འདི་དག་ལག་བསྟར་བྱས་ན་ཁོ་རེ་ཡ་ཕྱེད་གླིང་གི་མིག་སྔའི་གནས་ཚུལ་ཛ་དྲག་འགྲོ་མིན་ཐད་སེམས་ཁུར་བྱེད་སྲིད་དམ། ཡང་རྒྱལ་ཁབ་འགའ་ཤས་ནས་ཁོར་བྱང་གི་ཉིང་རྡུལ་གནད་དོན་ཐག་གཅོད་བྱ་ཐུབ་མིན་མཐའ་དག་ཀྲུང་གོའི་སྲིད་གཞུང་ལ་རག་ལས་ཡོད་པ་དང་། ཀྲུང་གོའི་སྲིད་གཞུང་གིས་ཁོར་བྱང་ལ་ཉིང་རྡུལ་བསྐྱུར་དགོས་པའི་སྐུལ་མ་བྱེད་དགོས་ཅེས་པར་ཁྱེད་རང་ལ་བསམ་ཚུལ་ག་འདྲ་ཡོད་ལགས།
དྲི་ལན།ཐེངས་འདིར་ཁོར་བྱང་ནས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་རྒྱལ་སྤྱིའི་སྤྱི་ཚོགས་ནས་ཁོར་བྱང་ལ་བསམ་ཚུལ་དྲག་པོ་བཏོན་ཡོད་འདུག་ལ། ཀྲུང་གོའི་སྲིད་གཞུང་གིས་ཀྱང་མིག་སྔའི་ཛ་དྲག་གི་གནས་བབས་ལ་དོ་ཁུར་བྱེད་སྒང་ཡིན་པ་དང་ཁོ་རེ་ཡ་ཕྱེད་གླིང་གི་མ་འོངས་པའི་གནས་ཚུལ་འཕེལ་ཕྱོགས་དང་བདེ་འཇགས་ཐད་དུ་སེམས་ཁུར་བྱེད་བཞིན་ཡོད་ལགས། ངས་ཁ་སང་ངོ་སྤྲོད་བྱས་པ་ལྟར། ཀྲུང་གོའི་སྲིད་གཞུང་དུས་ནམ་ཡིན་ཡང་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་མེད་པའི་དམིགས་ཡུལ་འབད་པ་དང་ཧུར་བརྩོན་བྱེད་བཞིན་ཡོད་ལ། མ་འོངས་པར་ད་དུང་མུ་འཐུད་དུ་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་མེད་པར་བཟོ་བའི་དམིགས་ཡུལ་དང་ཕྱོགས་གཉིས་བར་གྱི་བདེ་འཇགས་ཐད་དུ་འབད་རྩོན་བྱེད་མུས་ཡིན་པ་དང་། རྒྱལ་ཁབ་དྲུག་གི་གྲོལ་མོལ་ (Six-party talks)བརྒྱུད་ནས་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་ཐག་གཅོད་བྱ་རྒྱུའི་རྩ་དོན་ལྟར་འབད་པ་བྱེད་མུས་ཡིན་ལགས། ཁོ་རེ་ཡ་ཕྱེད་གླིང་གི་གནད་དོན་ནི་དུས་ཡུན་རིང་པོའི་ནང་དུ་བྱུང་བ་ཞིག་ཡིན་པ་དང་། ཤིན་རུ་སྣེ་འཛིང་དང་རྙོག་དྲ་ལྡན་པ་ཞིག་ཡིན་སྟབས། ཀྲུང་གོའི་སྲིད་གཞུང་གིས་དུས་ནམ་ཡིན་ཡང་རྒྱལ་ཁབ་དྲུག་གི་གྲོལ་མོལ་བརྒྱུད་ནས་གནད་དོན་ཐག་གཅོད་བྱེད་པའི་རྩ་དོན་ལ་བརྩི་སྲུང་བྱེད་བཞིན་ཡོད། རྒྱལ་ཁབ་དྲུག་གི་གྲོས་མོལ་བརྒྱུད་ནས་ཁོ་རེ་ཡ་ཕྱེད་གླིང་གི་གནད་དོན་ལ་ཐག་གཅོད་བྱ་རྒྱུར་ཀྲུང་གོའི་སྲིད་གཞུང་ལ་ཡིད་ཆེས་ཡོད་པ་དང་ཀྲུང་གོའི་སྲིད་གཞུང་གིས་འབྲེལ་ཡོད་ཕྱོགས་སོ་སོ་ནས་འབད་རྩོན་བྱས་ན་མ་འོངས་པར་ཁོ་རེ་ཡ་ཕྱེད་གླིང་གནད་དོན་ལ་ཐག་གཅོད་བྱ་ཐུབ་པར་ཡིད་ཆེས་བྱེད་བཞིན་ཡོད།
ཁོ་རེ་ཡ་ཕྱེད་གླིང་གི་གནད་དོན་ཐག་གཅོད་བྱེད་ན་ཁོ་རེ་ཡ་ཕྱེད་གླིང་ཙམ་མ་ཟད་ཡ་གླིང་བྱང་ཤར་གྱི་ས་ཁུལ་བདེ་འཇགས་དང་བཅས་པའི་ཕྱོགས་སོ་སོའི་ཁེ་ཕན་ལ་ཕན་སྲིད་སྟབས་དེ་ནི་ཕྱོགས་སོ་སོའི་འགན་འཁུར་ཡིན་ལ་ཕྱོགས་སོ་སོ་ནས་དམིགས་ཡུལ་འདི་འགྲུབ་སླད་འབད་རྩོན་བྱེད་དགོས། འབྲེལ་ཡོད་ཀྱི་རྒྱལ་ཁབ་ཁག་སོ་སོ་ནས་ས་ཁུལ་བདེ་འཇགས་དང་བཅས་པའི་ཕྱོགས་ཆེ་སར་བསམ་གཞིགས་བཏང་བ་བརྒྱུད། རྒྱལ་ཁབ་དྲུག་གི་གྲོལ་མོལ་གྱི་སྒོ་ཡང་བསྐྱར་དབྱེ་ནས་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་ཐག་གཅོད་བྱེད་དགོས།
དྲི་བ། ཉེ་ཆར། ཁོར་བྱང་གིས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་ཨ་རི་དང་ཉི་ཧོང་བཅས་པའི་རྒྱལ་ཁབ་སོ་སོས་ཁོར་བྱང་ལ་ཡང་བསྐྱར་དཔལ་འབྱོར་ཐད་དུ་སྟངས་འཛིན་བྱེད་དགོས་པའི་རེ་བ་འདོན་བཞིན་ཡོད་འདུག་ལ། གལ་སྲིད་རྒྱལ་ཁབ་དེ་དག་གིས་ཁོར་བྱང་ལ་དཔལ་འབྱོར་ཐད་སྟངས་འཛིན་བྱེད་དགོས་སྐོར་གྱི་གྲོས་གཞི་ཁག་མཉམ་འབྲེལ་རྒྱལ་ཚོགས་ཀྱི་ཚོགས་ཐོག་ཏུ་བཏོན་ཚེ། ཀྲུང་གོའི་སྲིད་གཞུང་གིས་ལངས་ཕྱོགས་དང་ལྟ་ཚུལ་ག་འདྲ་ཞིག་ཡིན་ནམ། ཁོར་བྱང་ལ་དཔལ་འབྱོར་ཐད་ནས་སྟངས་འཛིན་བྱེད་དགོས་རྒྱུར་རྒྱབ་སྐྱོར་བྱེད་སྲིད་དམ།
དྲི་ལན།ཕྱི་ཟླ་ ༡ པོའི་ཚེས་ ༧ ཉིན། མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཚོགས་ཀྱིས་གནས་ཚུལ་ཛ་དྲག་ཐད་ཀྱི་ཚོགས་འདུ་བསྡུས་ཡོད་པ་དང་། ཁོར་བྱང་གི་ཉིང་རྡུལ་འབར་གས་ཀྱི་ཚོད་ལྟ་བྱས་པའི་གནད་དོན་ཐད་གྲོས་ཞིབ་དང་གཏམ་བཤད་སོགས་སྤེལ་ཡོད་འདུག ཀྲུང་གོའི་སྲིད་གཞུང་ཀྱང་ཐེངས་འདིའི་ཁོར་བྱང་གི་ཉིང་རྡུལ་གནད་དོན་ཐད་ཀྱི་གྲོས་ཞིབ་ལ་ཞུགས་པ་ཡིན། ཀྲུང་གོའི་སྲིད་གཞུང་ནི་མཉམ་འབྲེལ་རྒྱལ་ཚོགས་ཀྱི་རྒྱུན་ལས་རྒྱལ་ཁབ་གྲས་ཡིན་སྟབས་ད་དུང་མུ་འཐུད་དུ་ཐེངས་རྗེས་མའི་བདེ་འཇགས་ལྷན་ཚོགས་ཀྱི་ཚོགས་འདུར་ཞུགས་རྒྱུ་ཡིན། ཀྲུང་གོའི་སྲིད་གཞུང་གིས་ཕྱོགས་སོ་སོ་དང་མཉམ་དུ་ཁོར་བྱང་གི་ཉིང་རྡུལ་གནད་དོན་ཐད་གྲོས་ཞིབ་བྱ་རྒྱུ་ཡིན་ལ་ཅི་ནུས་སྒོས་ཁོ་རེ་ཡ་ཕྱེད་གླིང་གི་ཉིང་རྡུལ་མེད་པའི་དམིགས་ཡུལ་དང་ཉིང་རྡུལ་ཕྱོགས་ཁྱབ་སུ་མི་འགྲོ་བའི་དམིགས་ཡུལ། ཡ་གླིང་བྱང་ཤར་གྱི་ས་ཁུལ་ལ་བདེ་འཇགས་བརྟན་བརླིང་ཡོང་རྒྱུའི་དམིགས་ཡུལ་ཐད་ནུས་ཤུགས་འདོན་རྒྱུ་ཡིན།
དྲི་བ། གསར་སྒྲགས་ལྟར་ན། རྒྱ་གར་དང་ཕ་ཁི་སི་ཐན་རྒྱལ་ཁབ་ཀྱི་སྲིད་བློན་གཉིས་ནས་ཕྱི་ཚེས་ ༥ ཉིན་རྒྱ་གར་གྱི་མཁའ་དམག་ས་ཚིགས་ལ་འཇིགས་སྐུལ་དོན་རྐྱེན་བྱུང་བར་ཁ་པར་གྱི་འབྲེལ་ལམ་བརྒྱུད་ནས་བསམ་ཚུལ་སོགས་བརྗེ་རེས་བྱས་ཡོད་འདུག་ལ། ཕ་ཁི་སི་ཐན་གྱི་སྲིད་གཞུང་ནས་ཐེངས་འདིའི་རྒྱ་གར་གྱི་མཁའ་དམག་ས་ཚིགས་ལ་འཇིགས་སྐུལ་དོན་རྐྱེན་བྱུང་བར་མགྱོགས་མྱུར་ངང་རྩད་གཅོད་དང་ཐག་གཅོད་ནན་མོ་བྱ་རྒྱུ་ཡིན་ལུགས་གསལ་སྒྲགས་བྱས་ཡོད་འདུག ཀྲུང་གོའི་སྲིད་གཞུང་གིས་ཐེངས་འདིར་རྒྱ་གར་མཁའ་དམག་ས་ཚིགས་ལ་འཇིགས་སྐུལ་དོན་རྐྱེན་བྱུང་བའི་ཐད་ལྟ་ཚུལལ་ག་འདྲ་ཞིག་འཛིན་བཞིན་ཡོད་ལགས།
དྲི་ལན།ང་ཚོས་ཀྱང་འབྲེལ་ཡོད་ཀྱི་གསར་འགྱུར་ཁག་ལ་དོ་སྣང་བྱུང་ཡོད། ཀྲུང་གོའི་སྲིད་གཞུང་གིས་རྒྱ་གར་དང་ཕ་ཁི་སི་ཐན་སྲིད་གཞུང་གཉིས་བར་གྱི་འབྲེལ་ལམ་ཡག་པོར་གཏོང་ཐབས་དང་ཕྱི་འབྲེལ་གྱི་འབྲེལ་བ་ཇེ་ལེགས་སུ་ཕྱིན་ཡོད་ན་དེར་དགའ་བསུ་བྱེད་བཞིན་ཡོིད་ལ། རྒྱ་གར་དང་ཕ་ཁི་སི་ཐན་རྒྱལ་ཁབ་གཉིས་ཀྱིས་མཉམ་འབྲེལ་ངང་འཇིགས་སྐུལ་རིང་ལུགས་པར་རྡུང་རྡེག་བྱེད་པར་རྒྱབ་སྐྱོར་ཡོད། ཀྲུང་གོ་ནི་རྒྱ་གར་དང་ཕ་ཁི་སི་ཐན་རྒྱལ་ཁབ་གཉིས་ཀྱི་ཁྱིམ་མཚེས་ཡིན་སྟབས། ཀྲུང་གོའི་སྲིད་གཞུང་གི་རེ་བར་ཕྱོགས་གཉིས་ནས་གྲོས་མོལ་དང་མཉམ་ལས་བརྒྱུད་འབྲེལ་ཡོད་གནད་དོན་ཁག་ལ་ཐག་གཅོད་དང་། ལྷག་པར་དུ་རྒྱལ་ཁབ་གཉིས་ཀྱི་འབྲེལ་ལམ་ཡག་པོར་ཕྱིན་ནས་ས་ཁུལ་བདེ་འཇགས་དང་འཕེལ་རྒྱས་ལ་འབད་རྩོན་བྱ་རྒྱུར་ཡིད་ཆེས་བྱེད་བཞིན་ཡོད།
དྲི་བ། ཀྲུང་གོའི་སྲིད་གཞུང་གིས་རྒྱལ་ཁབ་དྲུག་གི་གྲོས་མོལ་གྱི་སྒོ་མོ་བསྐྱར་དབྱེ་བྱེད་དགོས་པའི་ལྟ་ཚུལ་འདོིན་བཞིན་ཡོད་འདུག་ལ། ཡིན་ནའང་ཕྱི་ལོ་ ༢༠༡༣ ལོར་ཁོར་བྱང་གིས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པ་ནས་བཟུང་རྒྱལ་ཁབ་དྲུག་གི་གྲོས་མོལ་ཚོགས་འདུའི་སྒོ་བརྒྱབ། ཉིད་ཀྱིས་བལྟས་ན་རྒྱལ་ཁབ་དྲུག་གི་གྲོས་མོལ་ཚོགས་འདུར་ནུས་པ་ཡོད་དམ།དྲི་ལན།ཁོར་བྱང་གི་གནད་དོན་ཡང་བསྐྱར་བྱུང་ཟིན་པའི་ལོ་འདི་དག་ནི་རྒྱལ་ཁབ་དྲུག་གི་གྲོས་མོལ་ཚོགས་འདུ་དོན་མེད་དུ་གྱུར་པའི་དུས་སྐབས་ཤིག་ཡིན་འདུག ཉེ་ཆར་ཁོར་བྱང་གིས་ཡང་བསྐྱར་ཉིང་རྡུལ་ཚོད་ལྟ་བྱས་པ་དང་བསྟུན་ནས་རྒྱལ་ཁབ་དྲུག་གི་གྲོས་མོལ་ཚོགས་འདུའི་སྒོ་མོ་བསྐྱར་དབྱེ་བྱེད་དགོས་པ་ནི་ཁ་ཚ་དགོས་གཏུགས་ཀྱི་གནད་དོན་ཞིག་ཡིན་འདུག རྒྱལ་ཁབ་དྲུག་གི་གྲོས་མོལ་ཚོགས་འདུ་ནི་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་ཐག་གཅོད་བྱེད་ཀྱི་ཐབས་ལམ་དང་སྒོ་མོ་ཉག་གཅིག་ཡིན་ལ། ང་ཚོའི་རེ་བར་འབྲེལ་ཡོད་ཀྱི་རྒྱལ་ཁབ་སོ་སོ་ནས་མཉམ་དུ་འབད་རྩོན་བྱས་འོག མུ་འཐུད་དུ་རྒྱལ་ཁབ་དྲུག་གི་གྲོས་མོལ་ཚོགས་འདུའི་སྟེང་ཁོར་བྱང་གི་ཉིང་རྡུལ་གནད་དོན་ཐག་གཅོད་བྱ་རྒྱུར་བསམ་ཚུལ་འདོན་དགོས་ལ། རྒྱལ་ཁབ་དྲུག་གི་གྲོས་མོལ་ཚོགས་འདུ་ནི་ཁོར་བྱང་གི་ཉིང་རྡུལ་གནད་དོན་ཐག་གཅོད་བྱེད་ཀྱི་སྟེགས་བུ་དང་ཐབས་ལམ་ཉག་གཅིག་ཡིན།
དྲི་བ། གཅིག ཁ་སང་ཁོར་བྱང་གིས་ཉིང་རྡུལ་འབར་གས་ཀྱི་ཚོད་ལྟ་ཡང་བསྐྱར་བྱས་པར་ཁོར་བྱང་གི་ཕྱོགས་ནས་ཀྲུང་གོའི་སྲིད་གཞུང་ལ་སྔོན་བརྡ་བཏང་མེད་འདུག་ལ། འདི་ནི་ཁོར་བྱང་གིས་ཉིང་རྡུལ་འབར་གས་ཀྱི་ཚོད་ལྟ་ཐེངས་བཞི་ཙམ་བྱས་པའི་ནང་དུ་ཆེས་ཐོག་མར་ཀྲུང་གོའི་སྲིད་གཞུང་ལ་སྔོན་བརྡ་བཏང་མེད་པ་དེ་ཨེ་རེད། གཉིས། ཐེངས་འདིར་ཁོར་བྱང་གིས་ཉིང་རྡུལ་ཚོད་ལྟ་ཡང་བསྐྱར་བྱས་པར་ཀྲུང་གོའི་སྲིད་གཞུང་དང་ཁོར་བྱང་གི་ཆེས་མཐོའི་འགོ་ཁྲིད་ཁག་བར་ཤུགས་རྐྱེན་ག་འདྲ་ཞིག་ཐེབས་སྲིད་དམ།
དྲི་ལན།ལན་དང་པོར་ཐེངས་འདིའི་ཁོར་བྱང་གི་ཉིང་རྡུལ་འབར་གས་ཚོད་ལྟ་བྱས་པར་ཀྲུང་གོའི་སྲིད་གཞུང་ལ་སྔོན་བརྡ་བཏང་མེད། ལན་གཉིས་པར་ཀྲུང་གོའི་སྲིད་གཞུང་གི་ཁོ་རེ་ཡ་ཕྱེད་གླིང་གི་ཉིངརྡུལ་གནད་དོན་ཐད་ཀྱི་ལངས་ཕྱོགས་དང་བསམ་ཚུལ་ནི་དུས་ནམ་ཡིན་ཡང་འགྱུར་མེད་ཡིན། ཀྲུང་གོའི་སྲིད་གཞུང་གིས་ཁོར་བྱང་ནས་ཡང་བསྐྱར་ཉིང་རྡུལ་འབར་གས་ཀྱི་ཚོད་ལྟ་བྱས་པར་ངོ་རྒོལ་བྱེད་བཞིན་ཡོད་ལ། ཁོར་བྱང་གི་བྱ་བྱེད་འདི་དག་གིས་ཀྲུང་གོའི་སྲིད་གཞུང་དང་ཁོར་བྱང་སྲིད་གཞུང་གཉིས་བར་གྱི་རྒྱུན་ལྡན་འབྲེལ་བའི་འཕེལ་རྒྱས་ཐད་གནོད་སྐྱོན་དང་ཤུགས་རྐྱེན་ངན་པ་ཡོད་སྲིད།
དྲི་བ། ཀྲུང་གོའི་སྲིད་གཞུང་གིས་ཁོར་བྱང་ལ་དམིགས་པའི་སྲིད་ཇུས་ཐད། ནུབ་ཕྱོགས་ཀྱི་རྒྱལ་ཁབ་འགའ་ཤས་སུ་སྐྱོན་བརྗོད་བྱེད་བཞིན་ཡོད་འདུག་ལ། དཔེར་ན་ཁ་སང་ཨ་རིའི་ཐི་རན་ཕུའུ་ལགས་ཀྱིས་གསལ་བརྗོད་བྱས་པ་ལྟར། ཀྲུང་གོའི་སྲིད་གཞུང་གིས་ཁོར་བྱང་གི་ཉིང་རྡུལ་གནད་དོན་ཐད་ད་དུང་བྱ་བ་མང་པོ་ཞིག་བསྒྲུབ་འོས་ཏེ། ང་ཚོས་གོ་ཐོས་ལྟར་ན་ཀྲུང་གོ་དང་ཁོར་བྱང་བར་གྱི་རྒྱལ་མཚམས་ད་ལྟ་སྔར་བཞིན་ཕྱེ་ཡོད་པ་དང་རྒྱུན་ལྡན་ལྟར་འཁོར་སྐྱོར་བྱེད་བཞིན་ཡོད་འདུག ཀྲུང་གོའི་སྲིད་གཞུང་གིས་ཁོར་བྱང་ལ་འབྲུ་རིགས་དང་ནུས་ཁུངས་སོགས་ཀྱི་ཐད་ནས་རྒྱབ་སྐྱོར་བྱེད་བཞིན་ཡོད་འདུག་ལ། མང་ཤས་ནི་ད་དུང་ཕྱི་སྒྲགས་མ་ཡིན་པ་དེ་ལྟ་བུ་ཡིན་འདུག ཀྲུང་གོའི་སྲིད་གཞུང་གིས་ཁོར་བྱང་ལ་སྟངས་འཛིན་བྱེད་དགོས་ན་དེ་ནི་ལས་སླ་བོ་ཞིག་གི་ངང་བསྒྲུབ་ཆོག གལ་སྲིད་ཀྲུང་གོའི་སྲིད་གཞུང་གིས་ཁོར་བྱང་ལ་སྐྱོན་བརྗོད་དང་ངོ་རྒོལ་བྱེད་བཞིན་ཡོད་ན་ད་དུང་ཁོར་བྱང་ལ་འབྲུ་རིགས་དང་ནུས་ཁུངས་འདོན་སྤྲོད། ཚོང་ལས་མཉམ་འབྲེལ་སོགས་བྱེད་དགོས་ཅི།
དྲི་ལན། ངས་ཀྱི་ལྟ་ཚུལ་དེར་མོས་མཐུན་བྱེད་བཞིན་མེད། ངས་ཁ་སང་བཤད་པ་ལྟར། ཀྲུང་གོའི་སྲིད་གཞུང་གི་ཁོར་བྱང་གི་ཉིང་རྡུལ་གནད་དོན་ཐད་སྲིད་ཇུས་སྟེང་ནས་སམ་ཡང་ལག་ལེན་དངོས་ཀྱི་སྟེང་གང་ཡིན་རུང་ཐམས་ཅད་གཅིག་མཚུངས་ཡིན་པ་དང་། ཀྲུང་གོའི་སྲིད་གཞུང་གིས་ད་རག་བར་ཏུ་ཁོར་བྱང་གི་ཉིང་རྡུལ་གནད་དོན་དང་ཡ་གླིང་ཤར་བྱང་གི་ས་ཁུལ་བདེ་འཇགས་ཐད་རང་ནུས་ཀྱིས་འབད་པ་བྱེད་བཞིན་ཡོད། མ་འོངས་པར་ད་དུང་མུ་འཐུད་དུ་ཁོ་རེ་ཡ་ཕྱེད་གླིང་གི་ཉིང་རྡུལ་གནད་དོན་མེད་པར་བཟོ་བའི་དམིགས་ཡུལ་དང་ཕྱོགས་གཉིས་བར་གྱི་བདེ་འཇགས་ཐད་དུ་འབད་རྩོན་བྱེད་མུས་ཡིན།ཁོ་རེ་ཡ་ཕྱེད་གླིང་གི་གནད་དོན་ནི་དུས་ཡུན་རིང་པོའི་ནང་དུ་བྱུང་བ་ཞིག་ཡིན་པ་དང་། ཤིན་རུ་སྣེ་འཛིང་དང་རྙོག་དྲ་ལྡན་པ་ཞིག་ཡིན་སྟབས།རྒྱལ་ཁབ་དྲུག་གི་གྲོས་མོལ་བརྒྱུད་ནས་ཁོ་རེ་ཡ་ཕྱེད་གླིང་གི་གནད་དོན་ལ་ཐག་གཅོད་བྱ་རྒྱུར་ཀྲུང་གོའི་སྲིད་གཞུང་ལ་ཡིད་ཆེས་ཡོད་པ་དང་ཀྲུང་གོའི་སྲིད་གཞུང་གིས་འབྲེལ་ཡོད་ཕྱོགས་སོ་སོ་ནས་འབད་རྩོན་བྱས་ན་མ་འོངས་པར་ཁོ་རེ་ཡ་ཕྱེད་གླིང་གནད་དོན་ལ་ཐག་གཅོད་བྱ་ཐུབ་པར་ཡིད་ཆེས་བྱེད་བཞིན་ཡོད། ཁོ་རེ་ཡ་ཕྱེད་གླིང་གི་གནད་དོན་ཐག་གཅོད་བྱེད་ན་ཁོ་རེ་ཡ་ཕྱེད་གླིང་ཙམ་མ་ཟད་ཡ་གླིང་བྱང་ཤར་གྱི་ས་ཁུལ་བདེ་འཇགས་དང་བཅས་པའི་ཕྱོགས་སོ་སོའི་ཁེ་ཕན་ལ་ཕན་སྲིད་སྟབས་དེ་ནི་ཕྱོགས་སོ་སོའི་འགན་འཁུར་ཡིན་ལ་ཕྱོགས་སོ་སོ་ནས་དམིགས་ཡུལ་འདི་འགྲུབ་སླད་འབད་རྩོན་བྱེད་དགོས། ཀྲུང་གོའི་སྲིད་གཞུང་གིས་རྒྱལ་སྤྱིའི་འགན་འཁྲི་ཁག་མཐའ་དག་འབད་རྩོན་འོག་ཕྱོགས་སོ་སོ་དང་མཉམ་དུ་ཁོ་རེ་ཡ་ཕྱེད་གླིང་གི་ཉིང་རྡུལ་མེད་པའི་དམིགས་ཡུལ་ཐད་ནུས་ཤུགས་འབུལ་ངེས་ཡིན།
