ཟླ་3ཚེས་28ཉིན་ལ་བོད་ལྗོངས་ཀྱི་མི་རིགས་ཁག་གི་མི་དམངས་3000ལྷག་ཙམ་གྱིས་གཟབ་འཆོར་སྤྲས་ནས་ཕོ་བྲང་པོ་ཏ་ལའི་ཐང་ཆེན་དུ་སྤེལ་བའི་ཞིང་བྲན་ཁྲི་ཚོ་བརྒྱར་ཡར་ལངས་བཅིངས་འགྲོལ་ཐོབ་ནས་ལོ་ངོ་57འཁོར་བའི་དྲན་གསོའི་རྒྱལ་དར་བསྒྲེངས་པ་དང་རྒྱལ་གླུ་གཏོང་བའི་བྱེད་སྒོའི་ནང་ཞུགས་ཡོད་པ་རེད། དེ་སྔོན་མངའ་བདག་ཆེན་མོ་གསུམ་ལ་བྲན་གཡོག་རྒྱུག་པ་ནས་ད་ལྟ་རང་ཉིད་སོ་སོར་རླངས་འཁོར་ཡོད་པ་དང་། དེ་སྔོན་ན་ཚ་བྱུང་ཚེ་ཇུས་གཏོགས་བྱེད་མཁན་མེད་པ་ནས་ད་ལྟ་རིན་མེད་ཀྱི་སྨན་བཅོས་རོལ་ཆོག་པ་སོགས་ང་ཚོའི་འཚོ་བའི་ཕྱོགས་གང་ཅིའི་ཐད་ལ་འགྱུར་ལྡོག་ཧ་ཅང་ཆེན་པོ་བྱུང་ཡོད་ཅེས་ལྷ་ས་གྲོང་ཁྱེར་ཁྲེན་ཀོན་ཆུས་གཙང་རལ་སྡེ་ཁུལ་གྱི་ཡར་ལངས་ཞིང་བྲན་ཁྱིམ་ཚང་གི་འཐུས་མི་སྐལ་བཟང་ཕུན་ཚོགས་ཀྱིས་གསུངས་ཤིང་། གུང་ཁྲན་ཏང་མེད་ན་བོད་ལྗོངས་ཀྱི་སྤྱི་ཚོགས་ལ་འཕེལ་རྒྱས་དང་གོང་འཕེལ་ཡོད་མི་སྲིད།
སྐལ་བཟང་ཕུན་ཚོགས་ཀྱི་སྐད་ཆ་དྲང་མོ་དེ་ནི་བོད་ལྗོངས་མི་དམངས་ཀྱི་འཚོ་བ་ཡག་ཏུ་ཕྱིན་པའི་གནས་ཚུལ་དངོས་རེད། ད་ལྟ་སྐལ་བཟང་ཕུན་ཚོགས་གནས་སའི་གཙང་རལ་སྡེ་ཁུལ་དུ་དགུན་ཁ་དྲོད་རླངས་དང་རང་བྱུང་སོལ་རླངས་བེད་སྤྱོད་གཏོང་ཆོག་པ་དང་། བརྙན་འཕྲིན་དང་འཁྱག་སྒམ། གོས་འཁྲུད་འཕྲུལ་ཆས་སོགས་ཀྱི་ཁྱིམ་སྤྱོད་གློག་ཆས་ནི་མང་ཚོགས་ཚང་མའི་འཚོ་བའི་ཁྲོད་ཡོད་པ་ཞིག་རེད།
ཉེ་བའི་ལོ་ཤས་རིང་བོད་ལྗོངས་ཀྱིས་ཡུལ་སྐོར་རིག་གནས་དང་རང་བྱུང་གི་འཐུང་ཆུ། གཙང་བའི་ནུས་ཁུངས་སོགས་ལྗོངས་དར་གྱི་ཐོན་ལས་ལ་རྒྱབ་སྐྱོར་ཤུགས་ཆེན་བྱས་ཤིང་མཐོ་སྒང་དུ་འདེབས་གསོ་དང་བོད་སྨན། བོད་ཀྱི་ཁྱད་ལྡན་ལག་རྩལ་ལས་རིགས་སོགས་དམངས་ཕྱུག་ཐོན་ལས་མགྱོགས་མྱུར་གྱིས་གསོ་སྐྱོང་བྱེད་པ་དང་། ད་དུང་རང་འགུལ་གྱིས་རྒྱལ་ཁབ་ཀྱི་རྒྱུད་གཅིག་ལམ་གཅིག་གི་་འཛུགས་སྐྲུན་ནང་ཞུགས་ནས་འཕེལ་རྒྱས་ཀྱི་འགུལ་ནུས་ཇེ་མཐོར་གཏོང་གང་ཐུབ་བྱས་ཡོད་པ་རེད།
གྲངས་གཞི་ལྟར་2015ལོར་བོད་ལྗོངས་ཀྱི་དཔལ་འབྱོར་འཕེལ་རྒྱས་ཀྱི་མྱུར་ཚད་བབ་དང་ལྡོག་པའི་གོང་འཕེལ་བྱུང་ཞིང་། ན་ནིང་བོད་ལྗོངས་སུ་གཏན་འཇག་མ་རྩའི་ཁྲོད་མ་འཇོག་སྒོར་དུང་ཕྱུར་1342དོན་འཁྱོལ་བྱུང་བ་དང་། དངུལ་བུན་གཡར་བའི་ལྷག་གྲངས་སྒོར་དུང་ཕྱུར་2100ལས་བརྒལ་ཡོད་པ་རེད། བོད་ལྗོངས་ཡོངས་ཀྱི་རྒྱལ་ནང་ཐོན་སྐྱེད་རིན་ཐང་གི་བསྡོམས་འབོར་སྒོར་དུང་ཕྱུར་1000ལས་བརྒལ་ཡོད་པ་དང་11%འཕར་སྣོན་བྱུང་ཡོད་ཅིང་བསྟུད་མར་ལོ་23ལ་གྲངས་གནས་གཉིས་ཀྱི་འཕར་ཚད་རྒྱུན་འཁྱོངས་ཐུབ་ཡོད་པ་རེད། ལྷ་གཞིས་ལྕགས་ལམ་འཛུགས་སྐྲུན་ཐུབ་ནས་འཁོར་སྐྱོད་ཚོང་གཉེར་བྱེད་ཀྱི་ཡོད་པ་དང་། ལྷ་ཉིང་ལྕགས་ལམ་ཕྱོགས་ཡོངས་ནས་འཛུགས་སྐྲུན་བྱེད་འགོ་བརྩམས་ཡོད་ཅིང་། གཞུང་ལམ་གྱི་སྤྱིའི་རིང་ཚད་ནི་སྤྱི་ལེ་ཁྲི་7.8ཙམ་སླེབས་ཡོད་པ་དང་། གློག་ཤུགས་ཁྲོད་གློག་འདོན་འཕྲུལ་ཆས་ཀྱི་གློག་འདོན་ཚད་ནི་སྟོང་ཝ་230ཙམ་ཟིན་ཡོད་པ་དང་སྲིད་འཛིན་གྲོང་ཚོར་སྒུལ་འཕྲིན་གྱི་བརྡ་རྟགས་ཡོངས་སུ་ཁྱབ་ཐུབ་པ་བྱུང་ཞིང་། དྲ་སྐུད་འདྲེན་ཐུབ་པའི་བསྡུར་ཚད་ནི་80%ཡིན་པ་རེད།
དཔལ་འབྱོར་མགྱོགས་མྱུར་སྒོས་འཕེལ་རྒྱས་ཕྱིན་པ་དང་དུས་མཚུངས་སུ་བོད་ལྗོངས་ཀྱི་དེ་བས་མང་བའི་ནོར་ཤུགས་དམངས་འཚོའི་འཛུགས་སྐྲུན་གྱི་མངའ་ཁོངས་ཁྲོད་འཇོག་ཡོད་པ་རེད། 2015ལོར་བོད་ལྗོངས་ཀྱི་གྲོང་ཁྱེར་དང་གྲོང་རྡལ་གྱི་སྡོད་དམངས་ཀྱི་མི་རེས་ཆ་སྙོམས་བཀོད་སྒྲིག་བྱེད་ཆོག་པའི་ཡོང་འབབ་སྒོར་25457ཡིན་ཞིང་། དེ་ལོ་ལྔ་ཚན་བཅུ་གཅིག་པའི་དུས་མཇུག་དང་བསྡུར་ཚེ་66.8%འཕར་སྣོན་བྱུང་ཡོད་པ་རེད། གྲོང་གསེབ་ཀྱི་སྡོད་དམངས་ཀྱི་མི་རེས་ཆ་སྙོམས་བཀོད་སྒྲིག་བྱེད་ཆོག་པའི་ཡོང་འབབ་སྒོར་8244ཡིན་པས་བསྟུད་མར་ལོ་13ལ་གྲངས་གནས་གཉིས་ཀྱི་འཕར་ཚད་རྒྱུན་འཁྱོངས་བྱས་ཐུབ་ཡོད། རྒྱལ་ཡོངས་ནས་ལོ་15རིང་རིན་མེད་སློབ་གསོ་ཐོག་མར་མངོན་འགྱུར་བྱུང་ཞིང་། འགན་སྲུང་ལྔ་དང་དྭ་ཕྲུག་གཅིག་བསྡུས་ཀྱི་གསོ་ཉར་བྱ་རྒྱུ་ཐོག་མར་མངོན་འགྱུར་ཐུབ་ཡོད་པ་དང་། གྲོང་ཁྱེར་དང་གྲོང་གསེབ་ཀྱི་སྡོད་དམངས་ལ་རིན་མེད་གཟུགས་གཞི་བརྟག་དཔྱད་བྱ་རྒྱུ་ཐོག་མར་མངོན་འགྱུར་བྱུང་ཡོད་པ་རེད།
ལོ་ལྔ་ཚན་བཅུ་གཉིས་པའི་དུས་རིམ་ནང་བོད་ལྗོངས་ཀྱིས་སྤྱི་ཚོགས་གཏན་འཇགས་ཀྱི་མ་རྩའི་ཁྲོད་མ་འཇོག་ཁྱོན་བསྡོམས་སྒོར་དུང་ཕྱུར་4642ལེགས་སྒྲུབ་བྱུང་ཡོད་པ་དང་དེ་ལོ་ལྔ་ཚན་བཅུ་གཅིག་པ་དང་བསྡུར་ཚེ་ལྡབ་1.8འཕར་སྣོན་བྱུང་བ་རེད། མཚོ་བོད་དང་ཁྲོན་བོད་ཀྱི་གློག་དྲ་མཉམ་འབྲེལ་བྱེད་རྒྱུ་མངོན་འགྱུར་བྱུང་ཡོད་པ་དང་། གློག་དྲ་གཙོ་བོ་རྫོང་ཁག་ 58དུ་ཁྱབ་ཡོད་པ་རེད། འགྲིམ་འགྲུལ་དང་ཆུ་བེད། ནུས་ཁུངས། འཕྲིན་གཏོང་སོགས་ཀྱི་རྣམ་གྲངས་འབོར་ཆེན་ཞིག་འཛུགས་སྐྲུན་བྱེད་བཞིན་པའམ་ཡང་ན་བསྐྲུན་ཐུབ་ནས་ཐོན་སྐྱེད་ཁྲོད་ཞུགས་ཡོད་ཅིང་། གཞི་རྩའི་སྒྲིག་བཀོད། གྲོང་ཁྱེར་དང་གྲོང་གསེབ་ཀྱི་རྣམ་པ། མི་དམངས་མང་ཚོགས་ཀྱི་ཐོན་སྐྱེད་དང་འཚོ་བའི་ཆ་རྐྱེན་ལ་ལོ་རྒྱུས་རང་བཞིན་གྱི་འགྱུར་ལྡོག་བྱུང་ཡོད་པ་རེད།
ཉིང་ཁྲི་སོགས་ས་གནས་ཁག་གི་ཁམ་བུའི་མེ་ཏོག་བཞད་པ་དང་བསྟུན་ནས་བོད་ལྗོངས་ཡུལ་སྐོར་གྱི་དུས་ཚིགས་དེའང་ཁུ་སིམ་མེར་སླེབས་ཟིན། རང་གིས་རླངས་འཁོར་བཏང་ནས་ཡུལ་སྐོར་ཡོང་མཁན་མཁྱེན་ལྡན་པ་ལིན་ཧྥང་ཚང་གིས་ཉིང་ཁྲིའི་ཁམ་བུའི་མེ་ཏོག་གི་མཛེས་ལྗོངས་ལ་ལྟད་མོ་བལྟས་ཟིན་རྗེས་ལྷ་སར་སྐྱོད་པ་ཡིན། འདི་ནི་ང་རང་བོད་དུ་སླེབས་པ་ཐེངས་མ་དང་པོ་ཡིན། སྔོན་མ་བོད་ལྗོངས་ཀྱི་འགྲིམ་འགྲུལ་ཡག་པོ་མེད་པ་གོ་ཐོས་བྱུང་སོང་། དེས་མ་ཟད་རྒྱལ་ལམ་318ཀྱི་ལམ་བར་རྟག་པར་རླངས་འཁོར་འགག་གི་ཡོད་པ་གོ་མྱོང་ཡོད། ཐེངས་འདིའི་ལྗོངས་རྒྱུ་ཁྲོད་ངས་བསམ་པར་བོད་ལྗོངས་ཀྱི་འགྲིམ་འགྲུལ་ངས་བསམ་ཚོད་བྱས་པ་ལས་ཧ་ཅང་ཡག་པ་འདུག སླད་ཕྱིན་གོ་སྐབས་བྱུང་ན་ད་དུང་ཡོང་གི་ཡིན་ཞེས་ཟེར།
ལྷ་ས་ནས་བར་ཐག་ལེ་དབར་1000ལྷག་ཙམ་ཡོད་པའི་ཉིང་ཁྲིའི་རྫ་ཡུལ་རྫོང་རྫ་ཡུལ་རོང་སྟོད་གྲོང་རྡལ་གྱི་མཐོ་ཡུལ་གྲོང་ཚོའི་གྲོང་མི་རུའུ་ཐེ་ལུང་གི་ཁྱིམ་དུ་འཛུལ་མ་ཐག་མཛེས་ཉམས་ལྡན་པའི་ཏིང་རིགས་ཀྱི་ཁང་ཁྱིམ་ཕུད་མགྲོན་ཁང་ནང་གི་ཀོ་བའི་འབོལ་ཁྲི་དང་གློག་ཆས་རིགས་ཁག་ཆ་འགྲིག་ཏུ་སྒྲིག་ཡོད་པ་རེད། བོད་སྐྱོར་རྣམ་གྲངས་ཀྱི་རོགས་རམ་འོག་ཕག་པ་གསོས་པ་གཅིག་པུའི་ཐོག་ནས་མི་གྲངས་བདུན་ཡོད་པའི་རུའུ་ཐེ་ལུང་ཚང་ལ་ན་ནིང་ཡོང་འབབ་སྒོར་ཁྲི་8བྱུང་ཡོད་ཅིང་ད་ལོའི་ཟླ་བ་3པའི་བར་རུའུ་ཐེ་ལུང་གི་ཁྱིམ་ཚང་ལ་ཡོང་འབབ་སྒོར་ཁྲི་ 6ལྷག་ཙམ་བྱུང་ཡོད་པ་རེད།
ད་ཆ་བོད་ལྗོངས་ཀྱི་དཔལ་འབྱོར་བདེ་ཐང་དང་མགྱོགས་མྱུར་སྒོས་འཕེལ་རྒྱས་འགྲོ་བཞིན་ཡོད་པ་རེད། འབྱུང་ཁམས་ལེགས་པོ། མི་དམངས་བདེ་སྡོད་ལས་བརྩོན། སྤྱི་ཚོགས་བརྟན་བརླིང་འཆམ་མཐུན་བཅས་ཡིན་པས་ཕྱོགས་ཡོངས་ནས་འབྱོར་འབྲིང་སྤྱི་ཚོགས་བསྐྲུན་པའི་ལོ་རྒྱུས་འགོ་འཛུགས་གནས་གསར་པ་ཞིག་ཏུ་ཀྲོང་ངེར་ལངས་ཡོད་པ་རེད།
