བོད་ལྗོངས་དིང་རི་རྫོང་སྲིད་གཞུང་གིས་ལས་ཀ་བ་རྩ་འཛུགས་བྱས་ནས་ཇོ་རིའི་འདབས་སུ་ཡོམ་རྗེས་བསྐྱར་གསོའི་ལས་ཀ་སྤེལ་བཞིན་པའི་སྐབས་སུ། འཛམ་གླིང་གི་ཆེས་མཐོ་བའི་དགོན་པ་རུ་བསྔགས་པའི་རོང་ཕུ་དགོན་གྱི་ར་སྐོར་ནས་ལྗིད་ཚད་སྤྱི་རྒྱ26.6ཡོད་པའི་ཊམ་ཀ་རྙིང་བ་སྟོང་ཕྲག་ལྔ་དང་ལྔ་བརྒྱ་ལྷག་རྙེད་ཡོད།
དིང་རི་རྫོང་གིས་ཉེ་ཆར་རོང་ཕུ་དགོན་དུ་བརྟན་སྒྱུར་ཞིག་གསོ་སྤེལ་སྐབས་ར་སྐོར་ནས་ས་དོང་ཞིག་བརྡོལ་ཡོད་ཅིང་། དོང་དེའི་ནང་དུ་གནའ་བོའི་ཊམ་ཀས་གང་ཡོད་པ་རེད། ཌམ་ཀ་ཚང་མ་སྒོར་སྒོར་ཡིན་ཞིང་མང་ཤོས་ལ་ཆག་སྐྱོན་གང་ཡང་ཤོར་མེད་པ་དང་ངོས་གཉིས་ལ་རི་མོ་མི་འདྲ་བ་སྣ་ཚོགས་ཡོད། དེའི་ངོས་གཅིག་ལ་པད་མ་འདབ་མ་བརྒྱད་པ་ཨ་ལོང་གི་མཐའ་རུ་བསྐོར་ཡོད་ལ། ངོས་གཅིག་ཏུ་པད་མ་འདབ་མ་བརྒྱད་པ་གྲུ་བཞིའི་མཐའ་རུ་བསྐོར་ཡོད།
ཡར་ཞུ་ཐོས་འཕྲལ་དིང་རི་རྫོང་གི་འབྲེལ་ཡོད་མི་སྣ་ཡུལ་དངོས་སུ་ཕྱིན་ནས་ཊམ་ཀ་གཙང་བཟོ་དང་ཚད་འཇལ་ཐོ་འགོད་སོགས་ཀྱི་ལས་ཀ་སྤེལ་ཡོད།
དིང་རི་རྫོང་གི་རྫོང་དཔོན་ཝང་ཧྲེན་གྱིས་བརྗོད་དོན་ཊམ་ཀའི་ངོས་ཀྱི་རི་མོར་བལྟས་་དུས་རབས་བཅོ་བརྒྱད་པའི་སྐབས་སུ་དགའ་ལྡན་ཕོ་བྲང་གི་དབང་སྒྱུར་སྐབས་ཀྱི་ཡིན་པ་གཏན་འཁེལ་ཐུབ་ལ། མིག་སྔར་དིང་རི་རྫོང་གིས་གནས་ཚུལ་འདི་རང་སྐྱོང་ལྗོངས་ཀྱི་འབྲེལ་ཡོད་ལས་ཁུངས་ལ་སྙན་སེང་ཞུས་ཟིན་ལ། འབྲེལ་ཡོད་ཆེད་མཁས་པ་ཡུལ་དངོས་སུ་ཕེབས་ནས་ཊམ་ཀ་ལ་ཞིབ་འཇུག་བྱ་བར་གདན་འདྲེན་བྱས་ཡོད་པ་རེད།
ངོ་སྤྲད་པ་ལྟར་ན་དེ་སྔོན་ཀྲུང་གོའི་མི་དམངས་དངུལ་ཁང་གི་བོད་ལྗོངས་ཡན་ལག་དངུལ་ཁང་དངུལ་རྩ་ཞིབ་འཇུག་སོའོ་ཡི་དངུལ་ལོར་ཞིབ་འཇུག་ཚན་ཆུང་གིས་ཞིབ་འཇུག་གི་འབྲས་བུ་ལྟར་ན་བོད་ལྗོངས་ས་གནས་སུ་སྤྱི་ལོ1792ལོ་ནས་བཟུང་དངུལ་ལོར་བཟོས་པའི་ལོ་རྒྱུས་ཡོད་ཅིང་། ཀྲུང་དབྱང་སྲིད་གཞུང་གིས་ཆོག་མཆན་ཐོབ་པ་དང་བོད་སྡོད་ཨམ་བན་གྱིས་ལྟ་སྐུལ་འོག་བོད་ས་གནས་སྲིད་གཞུང་གིས་ཊམ་ཀ་ཚད་ལྡན་དང་པོ་བཟོས་པ་རེད།
(དབང་མོས་བསྒྱུར། )
